今日係10月29日，如果我地仲一齊緊，就會係拍拖三週年紀念。

尋晚又夢見你，或者真係日有所思吧。

內容大致係我知你成日放工後會去一個地方，好夜先返屋企，於是我比你早到，希望等到你，見你一面。等呀等，點知真係見到你同你而家Ｄ同事。我見你特登行慢Ｄ，仲時不時望向後面，好似發現左我咁。能夠見下你，我已經好心足，於是我離開了，但我竟然知道你11pm先走，哈哈！不過發夢既野就係咁～

現實中，我的確有諗過去你拍開車既地方，只為見下你部車，見到我都會覺得安心的。之前係因為返學、讀書、考試、壓抑自己等原因而冇去到，而家，更冇需要了，因為羊仔已不在。

不經不覺，同你分開左已經超過半年，喺呢段日子，我每日都會諗起你，諗起我地以往一齊既片段，有時會開心到笑左出黎，有時則因為太掛住你而流淚，就好似而家咁。

尋日係中秋節，喺去飲喜酒既途中，我抬頭一望，見到天上圓圓既月亮，心諗，如果你都有望過既話，都可以當係你陪我一齊睇既，我都會開心。見到Natalie結婚當日，雖然個樣有啲攰，但仍然感受到果份幸福。我一直都幻想住嫁俾你，同你一齊照顧小朋友既情景，我覺得你會係一個好爸爸，一個顧家既男人，但而家．．．到底呢個夢想將來仲有冇機會實現呢？

耐唔耐我就會翻睇你以前send俾我既sms，真係有無限感慨，節錄部份如下：
“我會喺天空既另一邊為你打氣”
“因為綁繩去．．．掛住你”
“我只想ONLY我可以影響到你開心唔開心，因為如果你真係可以做到既話，再加埋我既配合唔激你，咁你以後咪只有開心囉”
“我只係想你掛住我嗰時我出現，只要你想，我都會陪住你”
“你張得禁實，我點走得甩呀”
“i love u...... he he”(咁耐以黎唯一一次，所以對我黎講，好珍貴呢！）
“我都想喺廿五樓養隻牛牛”
“雖然冇人知一年後會點，但係都希望可以陪到你過聖誕，帶你去麥當勞食大餐”
“對一世嗰個，其實唔係自己最愛嗰個”（我唔希望呢句說話成真！）

最近呢一個月，掛住你既感覺愈趨強烈，多次想搵你，同你講：“可唔可以同返我一齊？”但係我唔敢，原因包括我怕你拒絕我、怕你已有新女朋友、冇把握能夠好好控制自己既情緒、我相信我同你之間點都會有條刺等等。好辛苦！

今日下晝，遇到一件事，令我相當震驚，簡直係難以置信！話說當時我正上緊網，忽然見到有個黑影捐咗入我床下底。我先呆一呆，再回想究竟我見到乜嘢，答案竟然係－老鼠！！！我即刻同阿嫲講、打俾爸爸、打俾朋友、打去管理處．．．細節我唔想多講，反正佢哋嘅對答同反應，毫無建設性不特止，仲令我加倍煩躁。我打開晒門同鐵閘，然後企咗喺走廊某一高出嘅地方喊，唔敢返入屋。嗰一刻，覺得自己好不幸嘅感覺又再次強烈起嚟，望住條街，真係想跳落去，咁從此就唔駛再捱再受苦。我有諗過打俾“你”求救，因為真係好絕望，但我驚你唔會嚟、拍緊拖、又或者係同朋友去緊街．．．再者，你嚟到又真係救到我嗎？你唔驚老鼠嗎？你有辦法令佢從床下底走出嚟嗎？過咗唔知幾耐，隻衰老鼠終於捨得死返出屋，仲向住我跑過嚟！我尖叫，跳返落地衝入屋，當然第一時間關門啦！

其實我仲係好唔放心，話晒佢好有可能仲喺我呢層，最慘係我驚阿嫲襯我唔喺屋企又開返門。住咗廿幾年，第一次見到大廈裡面有老鼠，真係Ｏ晒咀！到底我仲要喺度住幾耐？真命天子幾時帶我走？如果命中註定我一世冇好日子過的話，我希望上天能夠早一點帶走我。

尋晚8點半，無線播出“再說一次我愛你”，呢套電影由劉德華、楊采妮、蔡卓妍主演。之前睇左成個禮拜廣告，我已經好期待要睇，果然不負所望，套戲真係好好睇！我差唔多由頭喊到落尾，原因，當然係因為你啦！當中有唔少對白，都會令我諗起你。例如劉德華同楊采妮講，大家重頭開始，就唔好再嘥時間發脾氣；而楊采妮又講左句原來劉德華走左之後，佢個心係會咁痛．．．

你知道嘛，其實我好掛住你架！我成日都會諗起你對我既好！但我唔搵你，係因為我知道我地並唔適合對方，大家根本冇辦法和睦共處，你改唔到周圍睇/撩女仔既性格，我亦忍受唔到你呢樣野。而且，隨住年紀愈大，愈覺得單單擁有愛情並唔足夠，同時我亦需要麵包。知你仲有賭錢，又會嘥錢買埋ｄ無謂野，我真係好失望。我唔奢望你能夠養埋我，但最起碼你都要照顧到你自己丫。同你一齊，我成日都要擔心你有冇錢洗；想睇場戲，你又話等第日租碟先睇，一ｄ情趣都冇。如果將來我地結左婚，我仲要同你一齊還債，我實在唔想過呢種日子！

相愛而唔能夠一齊，任由時間沖淡我地之間既感情，我覺得好殘忍，但又有咩辦法呢？

今晚同屋企人去ａｐｍ食飯，最後阿哥揀左牛陣。我一直都想試呢間，因為好耐以前，熱牛奶曾經帶過我去，但當時我發脾氣，乜都唔肯食。呢件事之後，我唔敢o係佢面前再提去牛陣，我知佢會唔理我多。

一路食，一路諗返以前既野，覺得好對佢唔住。果次其實只係ｄ小事，大約係我講左想去某某地區食飯，但佢因為唔想食完後由老遠車我返屋企，所以車我去ａｐｍ食。本來我都冇乜野，但坐坐下，忽然愈諗愈嬲，嬲佢對我懶，懶得車我返去，所以開始發脾氣。

果度係專食日本或澳洲牛既自助餐，以人頭計，都幾貴下。當時我乜都唔肯食，個傻佬仲以為我嬲佢唔俾我食雪糕（我未至於無聊到咁）。我見佢食到好飽，但都仲要食，咁梗係啦，咁貴，成四百幾五百蚊一餐，仲要係一個人食喎！唉～而家我可以做既，就只有同你講聲「對唔住」。

基於大家唔係咁方便聯絡（怕更加欲斷難斷），我都係唔ｓｍｓ你啦。